देवकीच्या पोटातून
यशोदेच्या ओटीत
गेलेला तू.....
तिच्या अंगणातून अलगद निसटलास

काल परवा यमुनातटी
पेंद्यासवे खेळता खेळता
पटकन् नजरेआड
झालास..
बासरीच्या सुरांची
मोहिनी पडलेल्या
राधेला .....तू दिसलास
पाठमोरा......क्षितिजापल्याड जाताना
आहे माहीत तू आहेस निर्मोही
आणि अजन्माही.

पण सावळ्या, एकदाच
फक्त एकदाच परत जन्म घे
फिरून गोकुळात ये
दिसेल तुला उंबरठ्यावर
उभी यशोदा
तुझीच वाट पाहताना;
दिसतील कदंबाखाली
रास रचून गोपगोपी
तुझ्या एका पदन्यासासाठी
आतुरलेले..
आणि कालिंदीच्या जळात
पाय सोडून बसलेली राधा,
तुझ्या विश्वमोहिनीची धुंदी
अजून नाही ओसरलेली..
आणि उमजेल तुला मुकुंदा
की युगांपूर्वीच्या गोकुळात
आजही सर्व तसेच आहे.